ਨਵੀਂ ਦਿੱਲੀ: ਦਿੱਲੀ ਦੇ ਮਲਕਾਗੰਜ ਇਲਾਕੇ ਵਿੱਚ ਇੱਕ ਵੱਡਾ ਹਾਦਸਾ ਹੋਇਆ ਹੈ। ਇੱਥੇ ਤਿੰਨ ਮੰਜ਼ਿਲਾ ਇਮਾਰਤ ਢਹਿ ਗਈ ਹੈ। ਇਮਾਰਤ ਦੇ ਮਲਬੇ ਹੇਠ ਕਈ ਲੋਕਾਂ ਦੇ ਫਸੇ ਹੋਣ ਦਾ ਖਦਸ਼ਾ ਹੈ। ਸਵੇਰੇ ਕਰੀਬ 11.50 ਵਜੇ ਅੱਗ ਬੁਝਾਊ ਵਿਭਾਗ ਨੂੰ ਇਮਾਰਤ ਦੇ ਢਹਿ ਜਾਣ ਬਾਰੇ ਫੋਨ ਆਇਆ। ਫਿਲਹਾਲ ਦੋ ਲੋਕਾਂ ਨੂੰ ਬਚਾਇਆ ਗਿਆ ਹੈ ਅਤੇ ਹਸਪਤਾਲ ਲਿਜਾਇਆ ਗਿਆ ਹੈ।
ਜਿਸ ਜਗ੍ਹਾ ‘ਤੇ ਇਮਾਰਤ ਡਿੱਗੀ ਹੈ ਉਹ ਸਬਜ਼ੀ ਮੰਡੀ ਥਾਣੇ ਅਧੀਨ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਹੇਠਲੀ ਮੰਜ਼ਿਲ ‘ਤੇ ਦੁੱਧ ਦੀ ਦੁਕਾਨ ਸੀ। ਇਸ ਵਿੱਚ ਕੁਝ ਉਸਾਰੀ ਦਾ ਕੰਮ ਚੱਲ ਰਿਹਾ ਸੀ। ਜਦੋਂ ਇਮਾਰਤ ਢਹਿ ਗਈ, ਹੇਠਾਂ ਕਈ ਵਾਹਨ ਵੀ ਖੜ੍ਹੇ ਸਨ। ਹਾਲਾਂਕਿ, ਇਹ ਅਜੇ ਸਪੱਸ਼ਟ ਨਹੀਂ ਹੈ ਕਿ ਉਨ੍ਹਾਂ ਵਾਹਨਾਂ ਦੇ ਅੰਦਰ ਲੋਕ ਸਨ ਜਾਂ ਨਹੀਂ। ਫਿਲਹਾਲ ਫਾਇਰ ਬ੍ਰਿਗੇਡ ਦੀਆਂ 7 ਟੀਮਾਂ ਰਾਹਤ ਅਤੇ ਬਚਾਅ ਕਾਰਜਾਂ ਨੂੰ ਨੇਪਰੇ ਚਾੜ੍ਹਨ ਲਈ ਮੌਕੇ ‘ਤੇ ਮੌਜੂਦ ਹਨ। ਬਹੁਤ ਸਾਰੇ ਲੋਕਾਂ ਨੂੰ ਹਸਪਤਾਲ ਲਿਜਾਇਆ ਗਿਆ ਹੈ।
ਤਿਮਾਰਪੁਰ ਤੋਂ ਆਮ ਆਦਮੀ ਪਾਰਟੀ ਦੇ ਵਿਧਾਇਕ ਦਿਲੀਪ ਪਾਂਡੇ ਨੇ ਏਬੀਪੀ ਨਿਊਜ਼ ਨੂੰ ਦੱਸਿਆ, “ਜਿਹੜੀ ਤਿੰਨ ਮੰਜ਼ਿਲਾ ਇਮਾਰਤ ਡਿੱਗੀ ਹੈ ਉਹ ਲਗਭਗ 75 ਸਾਲ ਪੁਰਾਣੀ ਹੈ। ਇਸ ਇਮਾਰਤ ਦੇ ਹੇਠਾਂ ਲਕਸ਼ਮਣ ਪ੍ਰਸਾਦ ਹਲਵਾਈ ਨਾਂ ਦੇ ਵਿਅਕਤੀ ਦੀ ਦੁਕਾਨ ਹੈ। ਉਪਰਲੀਆਂ ਮੰਜ਼ਿਲਾਂ ‘ਤੇ ਕੋਈ ਨਹੀਂ ਰਹਿੰਦਾ ਸੀ। ‘ਪਾਂਡੇ ਨੇ ਕਿਹਾ, ‘ਇਹ ਇਮਾਰਤ ਛੇਦੀ ਲਾਲ ਨੇ ਇੱਕ ਬਿਲਡਰ ਨੂੰ ਵੇਚ ਦਿੱਤੀ ਸੀ। ਪਰ ਬਿਲਡਰ ਨੇ ਇਸ ਇਮਾਰਤ ਨੂੰ ਨਹੀਂ ਢਾਹਿਆ। ਬਿਲਡਰ ਹੁਣ ਇਮਾਰਤ ਦੀ ਹੇਠਾਂ ਤੋਂ ਖੁਦਾਈ ਕਰਵਾ ਰਿਹਾ ਸੀ ਅਤੇ ਇਹ ਹੁਣ ਦੁਰਘਟਨਾ ਵਾਪਰ ਗਈ ਹੈ।’
